Home Blog Page 531

કોણ છે ભારતમાં જન્મેલા એશ્લે ટેલિસ? જેમના પર લાગ્યો ચીન માટે જાસૂસી કરવાનો આરોપ

એફબીઆઈના સોગંદનામા મુજબ આ વર્ષના સપ્ટેમ્બર અને ઓક્ટોબરમાં, ટેલિસને પેન્ટાગોનના નેટ એસેસમેન્ટ ઓફિસમાં સંવેદનશીલ માહિતી સુવિધામાં પ્રવેશતા જોવામાં આવ્યો હતો. ટેલિસ લશ્કરી વિમાન ક્ષમતાઓ સહિત વર્ગીકૃત દસ્તાવેજો, કેમેરામાં લેતા અને છાપતા કેદ થયો હતો.

ભારત બાબતોના અમેરિકી નિષ્ણાત અને અમેરિકી સરકારના ટોચના સલાહકાર એશ્લે ટેલિસની વર્ગીકૃત દસ્તાવેજો રાખવા અને ચીન માટે કથિત રીતે જાસૂસી કરવાના આરોપસર ધરપકડ કરવામાં આવી છે. 64 વર્ષીય એશ્લે ટેલિસનો જન્મ ભારતમાં થયો હતો પરંતુ હવે તેઓ અમેરિકી નાગરિકતા ધરાવે છે. ટેલિસ 2000 થી અમેરિકી વિદેશ વિભાગના સલાહકાર છે. ટેલિસ ભૂતપૂર્વ અમેરિકી રાષ્ટ્રપતિ જ્યોર્જ ડબલ્યુ. બુશના કાર્યકાળ દરમિયાન રાષ્ટ્રીય સુરક્ષા પરિષદમાં પણ સેવા આપી ચૂક્યા છે.

ભારત સાથે તેમનો શું સંબંધ છે?

એશ્લે ટેલિસનો જન્મ મુંબઈમાં થયો હતો અને તેમણે સેન્ટ ઝેવિયર્સ કોલેજમાંથી રાજકીય વિજ્ઞાનમાં સ્નાતકની ડિગ્રી અને બોમ્બે યુનિવર્સિટીમાંથી માસ્ટર ડિગ્રી મેળવી હતી. તેમણે શિકાગો યુનિવર્સિટીમાંથી ડોક્ટરેટની પદવી મેળવી હતી. જ્યોર્જ ડબલ્યુ. બુશના વહીવટ દરમિયાન, ટેલિસ રાષ્ટ્રપતિના વિશેષ સહાયક અને રાષ્ટ્રીય સુરક્ષા પરિષદમાં દક્ષિણપશ્ચિમ એશિયા માટેના વરિષ્ઠ નિર્દેશક તરીકે સેવા આપી હતી. તેમણે ભારતમાં યુએસ રાજદૂતના વરિષ્ઠ સલાહકાર તરીકે પણ સેવા આપી હતી. હાલમાં, ટેલિસ કાર્નેગી એન્ડોમેન્ટ ફોર ઇન્ટરનેશનલ પીસમાં ટાટા ચેર અને સિનિયર ફેલો ધરાવે છે. તેમને આંતરરાષ્ટ્રીય સુરક્ષા, સંરક્ષણ અને એશિયન બાબતોના નિષ્ણાત માનવામાં આવે છે.

ટેલિસે 2000ના દાયકામાં ભારત અને યુનાઇટેડ સ્ટેટ્સ વચ્ચેના સીમાચિહ્નરૂપ નાગરિક પરમાણુ કરારની વાટાઘાટોમાં પણ મુખ્ય ભૂમિકા ભજવી હતી. જોકે, તાજેતરના વર્ષોમાં તેમને ચીન તરફ ઝુકાવ અને ભારત-અમેરિકા સંબંધોનો વિરોધ કરતા જોવામાં આવ્યા છે. ટેલિસે રશિયા અને ઈરાન સાથેના ભારતના સંબંધો પર પ્રશ્ન ઉઠાવ્યા હતા અને ભારતની ક્ષમતાઓ પર શંકા વ્યક્ત કરી હતી.

ટેલિસ સામે ગંભીર આરોપો

ભારતીય મૂળના એશ્લે જે. ટેલિસ, જે યુએસ સ્ટેટ ડિપાર્ટમેન્ટના ભૂતપૂર્વ વરિષ્ઠ સલાહકાર છે, તેમના પર ગુપ્ત દસ્તાવેજો રાખવાનો અને ચીની અધિકારીઓ સાથે સંપર્ક કરવાનો આરોપ મૂકવામાં આવ્યો છે. ફોક્સ ન્યૂઝે યુએસ જસ્ટિસ ડિપાર્ટમેન્ટના દસ્તાવેજોને ટાંકીને અહેવાલ આપ્યો છે કે 11 ઓક્ટોબરના રોજ વર્જિનિયાના વિયેનામાં ટેલિસના ઘર, કાર અને તેમના નજીકના લોકોના રહેઠાણો પર દરોડા દરમિયાન અસંખ્ય ગુપ્ત દસ્તાવેજો મળી આવ્યા હતા. યુએસ તપાસકર્તાઓએ ફેડરલ કોર્ટના આદેશ પર દરોડા પાડ્યા હતા.

ટેલિસના ઘરે ફાઇલો અને કચરાપેટીમાં 1,000 થી વધુ અત્યંત સંવેદનશીલ સરકારી દસ્તાવેજો મળી આવ્યા હતા. ટેલિસ વિરુદ્ધ દાખલ કરાયેલ FBI એફિડેવિટમાં તેમને સ્ટેટ ડિપાર્ટમેન્ટના પગાર વગરના સલાહકાર અને પેન્ટાગોનમાં કોન્ટ્રાક્ટર તરીકે દર્શાવવામાં આવ્યા છે. FBI એફિડેવિટ મુજબ, આ વર્ષના સપ્ટેમ્બર અને ઓક્ટોબરમાં, ટેલિસ પેન્ટાગોનના નેટ એસેસમેન્ટ ઓફિસમાં સેન્સિટિવ ઇન્ફર્મેશન ફેસિલિટીમાં પ્રવેશતા જોવા મળ્યા હતા. ટેલિસને કેમેરામાં કેદ કરવામાં આવ્યો હતો અને ગુપ્ત દસ્તાવેજો છાપવામાં આવ્યા હતા, જેમાં લશ્કરી વિમાન ક્ષમતાઓ પરના દસ્તાવેજોનો પણ સમાવેશ થાય છે. ટેલિસ તેની બેગમાં આ ગુપ્ત દસ્તાવેજો પણ લઈ જતા જોવા મળ્યો હતો.

એફિડેવિટમાં જણાવાયું છે કે 25 સપ્ટેમ્બર, 2025 ના રોજ ટેલિસે સ્ટેટ ડિપાર્ટમેન્ટની ક્લાસનેટ સિસ્ટમ ઍક્સેસ કરી હતી, જેનો ઉપયોગ ગુપ્ત સંદેશાવ્યવહાર માટે થાય છે. તપાસમાં જાણવા મળ્યું કે તેણે યુએસ એરફોર્સ સંબંધિત 1,288 પાનાની ફાઈલો ખોલી અને તેને ફરીથી સેવ કરી તેમના નામ બદલ્યા અને ફાઇલના પાનાઓ પ્રિન્ટ કર્યા. પછી, 10 ઓક્ટોબરના રોજ ટેલિસ ફરીથી પેન્ટાગોન સુવિધામાં પ્રવેશતા જોવા મળ્યા અને તે દસ્તાવેજો વાંચતા પણ દેખાયા.

ચીન માટે જાસૂસી કરવાનો આરોપ

એફબીઆઈનું કહેવું છે કે ટેલિસ છેલ્લા કેટલાક વર્ષોમાં વર્જિનિયાના એક રેસ્ટોરન્ટમાં ચીની સરકારી અધિકારીઓ સાથે ઘણી વખત મળ્યા હતા. ટેલિસ પર એક મુલાકાત દરમિયાન ચીની અધિકારીઓને એક પરબિડીયું આપવાનો આરોપ છે. ચીની અધિકારીઓએ બે વાર ટેલિસને ભેટ પણ આપી હતી. તેથી, ટેલિસ પર ચીન માટે જાસૂસી કરવાનો આરોપ મૂકવામાં આવી રહ્યો છે. ન્યાય વિભાગે કહ્યું કે જો ટેલિસ ગેરકાયદેસર રીતે વર્ગીકૃત અને અત્યંત સંવેદનશીલ દસ્તાવેજો રાખવા બદલ દોષિત ઠરે છે, તો તેને 10 વર્ષ સુધીની જેલ અને $25,000 નો દંડ થઈ શકે છે.

દિલ્હી-NCRવાસીઓને દિવાળીમાં ગ્રીન ફટાકડાઓની ‘સુપ્રીમ’ ભેટ

નવી દિલ્હી: સુપ્રીમ કોર્ટે દિલ્હી-NCRવાસીઓને દિવાળીની ભેટ આપી છે. દિલ્હી-NCRમાં ફટાકડા પ્રતિબંધ મામલે CJI બી.આર. ગવઈ અને ન્યાયમૂર્તિ વિનોદ ચંદ્રનની ખંડપીઠે અહીં “ગ્રીન ફટાકડા” ફોડવાની મંજૂરી આપી છે. અગાઉની સુનાવણીમાં કોર્ટે ફટાકડા પ્રતિબંધમાં છૂટ આપવાની સંકેતો આપ્યા હતા. કોર્ટે જણાવ્યું હતું કે દિલ્હી-NCRમાં ફટાકડા ફોડવા પર સંપૂર્ણ પ્રતિબંધ મૂકવો ન તો વ્યાવહારિક છે અને ન તો આદર્શ સ્થિતિ છે.

સુપ્રીમ કોર્ટે છેલ્લી સુનાવણીમાં ગ્રીન ફટાકડાના ઉત્પાદન અને વેચાણને મંજૂરી આપવાની અરજીઓ પરનો નિર્ણય અનામત રાખ્યો હતો. તે સમયે કોર્ટે અધિકારીઓને પૂછ્યું હતું કે ફટાકડા પ્રતિબંધ બાદ હવામાં ગુણવત્તા સૂચકાંક (AQI) પર કોઈ અસર થઈ હતી કે નહીં.

ચીફ જસ્ટિસ ગવઈએ શું કહ્યું

સુનાવણી દરમ્યાન ચીફ જસ્ટિસ ગવઈએ કહ્યું હતું કે ફટાકડાઓની દાણચોરી થતી હોવાથી એ ગ્રીન ફટાકડા કરતાં પણ વધારે નુકસાનકારક સાબિત થાય છે. તેમણે કહ્યું હતું કે આ મુદ્દે સંતુલિત અભિગમ અપનાવવાની જરૂર છે.ચીફ જસ્ટિસે જણાવ્યું કે અમે સોલિસિટર જનરલ અને એમિકસ ક્યુરીનાં સૂચનો પર વિચાર કર્યો છે. કોર્ટે નોંધ્યું છે કે ઉદ્યોગ ક્ષેત્રની પણ ચિંતા યોગ્ય છે,  પરંપરાગત ફટાકડાઓની દાણચોરી થતી હોવાથી તે વધુ હાનિકારક બને છે.

અમારે સંતુલિત દ્રષ્ટિકોણ અપનાવવો પડશે. હરિયાણાના 22 જિલ્લાઓમાંથી 14 જિલ્લા NCRમાં આવે છે. જ્યારે પ્રતિબંધ મૂકવામાં આવ્યો હતો, ત્યારે (કોરોના સમયને છોડીને) હવાની ગુણવત્તામાં ખાસ ફેરફાર થયો નહોતો. ગ્રીન ફટાકડા આવ્યા બાદ છેલ્લાં છ વર્ષોમાં પ્રદૂષણમાં નોંધપાત્ર ઘટાડો થયો છે, જેમાં NEREનું પણ મહત્વપૂર્ણ યોગદાન રહ્યું છે.

NDAમાં બધું સમુસૂતરું નથીઃ નારાજ ઉપેન્દ્ર કુશવાહા દિલ્હી રવાના

પટનાઃ બિહાર ચૂંટણીને લઈને NDAમાં સીટ શેરિંગ ફોર્મ્યુલા નક્કી થયા બાદ પણ બધું સમુંસૂતરું નથી. રાષ્ટ્રીય લોક મોરચાના ઉપેન્દ્ર કુશવાહાએ મહુઆ વિધાનસભા બેઠકને લઈને અસંતોષ વ્યક્ત કરી રહ્યા છે. ઉપ મુખ્ય મંત્રી સમ્રાટ ચૌધરી અને કેન્દ્રીય પ્રધાન નિત્યાનંદ રાયે કુશવાહાના નિવાસસ્થાને જઈને મુલાકાત કરી હતી. કુશવાહા અમિત શાહને મળવા દિલ્હી રવાના થયા છે.

RLMપ્રમુખ ઉપેન્દ્ર કુશવાહાએ કહ્યું હતું કે સમ્રાટ ચૌધરી અને નિત્યાનંદ રાય મને હાથ જોડીને ચાલ્યા ગયા હતા, હું નારાજ છું કે ખુશ છું એ પ્રશ્ન નથી. હું એટલું જ કહું છું કે NDAમાં બધું ઠીક નથી.ભાજપના નેતાઓ સાથેની બેઠક બાદ ઉપેન્દ્ર કુશવાહાએ પાર્ટીની ઈમરજન્સી બેઠક બોલાવી હતી, પરંતુ પછી તેમણે કહ્યું હતું કે કેન્દ્રીય ગૃહમંત્રી અમિત શાહ સાથે મુલાકાતને કારણે બેઠક સ્થગિત કરવામાં આવી છે. તેમણે જણાવ્યું હતું કે હું દિલ્હી જઈ રહ્યો છું. NDAમાં જે નિર્ણયો લેવામાં આવ્યા છે તેના પર ચર્ચા કરવાની જરૂર છે. હું એ મુદ્દા પર વાત કરવા દિલ્હી જઈ રહ્યો છું. મને આશા છે કે બધું ઠીક થઈ જશે. કેન્દ્રીય પ્રધાન નિત્યાનંદ રાયે જણાવ્યું હતું કે જેમ ઉપેન્દ્રજીએ કહ્યું છે, બધું ઠીક છે અને જલદી જ બધું ઠીક થઈ જશે.

NDAમાં કોણ કેટલી બેઠકો પર લડશે

NDAએએ આવનારી વિધાનસભા ચૂંટણી માટે બેઠકોના વહેંચણીની ફોર્મ્યુલા જાહેર કરી છે. તે મુજબ ભાજપ અને JDU 101-101 બેઠકો પર લડશે, ચિરાગ પાસવાનની લોક જનશક્તિ પાર્ટી (રામવિલાસ) 29 બેઠકો પર, જ્યારે હિન્દુસ્તાની અવામ મોરચા અને રાષ્ટ્રીય લોક મોરચા છ-છ બેઠકો પર ચૂંટણી લડશે.

સીટ શેરિંગ બાદ કુશવાહાએ સમર્થકો પાસે માફી માગી

સીટ શેરિંગ બાદ ઉપેન્દ્ર કુશવાહાએ પોતાના સમર્થકોને માફી માગતા એક પોસ્ટ કરી હતી. તેમણે X પર લખ્યું હતું  કે પ્રિય મિત્રો-સાથીઓ, આપ સૌ પાસેથી ક્ષમા માગું છું. તમારા મન મુજબ બેઠકોની સંખ્યા ન થઈ શકી.

વાહ ભાઈ વાહ! ૧૫ ઑક્ટોબર ૨૦૨૫

પંચાંગ 15/10/2025

ક્રિસ્પી ફરાળી ફ્રેન્ચ ફ્રાઈસ

દિવાળીમાં બાળકોનું વેકેશન, ઉપરાંત એકાદશીનું વ્રત પણ ખરું! ત્યારે ફરાળી ફ્રેન્ચ ફ્રાઈસ બનાવી શકાય! જેનું નામ લેતાં જ બાળકો તો ખુશ થઈ જ જશે! અને હા, આ ફરાળી ફ્રાઈસ બનાવવા સહેલા પણ છે!

સામગ્રીઃ

  • સાબુદાણા 2 કપ
  • બાફેલાં બટેટા 4-5
  • આદુ-મરચાંની અધકચરી વાટેલી પેસ્ટ ટે.સ્પૂન અથવા 2-3 લીલા મરચાં ગોળ સમારેલાં
  • શેકેલી શીંગનો ભૂકો અડધો કપ
  • કાળા મરી પાઉડર ¼ ટી.સ્પૂન
  • લીંબુનો રસ 1 ટે.સ્પૂન
  • ખાંડ ¼ ટી.સ્પૂન
  • જીરુ 1 ટી.સ્પૂન
  • ધોઈને સમારેલી કોથમીર 1 કપ
  • તેલ તળવા માટે
  • સિંધવ મીઠું સ્વાદ મુજબ

રીતઃ સાબુદાણાને 2-3 પાણીએથી ધોઈને એક છીછરા વાસણમાં ડૂબતા પલાળો. (2 કપ સાબુદાણામાં 1 કપ જેટલું પાણી ઉમેરવું.) આ સાબુદાણા 4 કલાક માટે પલાળો.

ત્યારબાદ એક વાસણમાં પલળેલા સાબુદાણા લઈ, તેમાં બાફેલા બટેટાને છૂંદીને ઉમેરો. સાથે સ્વાદ મુજબ સિંધવ મીઠું, અધકચરી વાટેલી આદુ-મરચાંની પેસ્ટ, શીંગનો ભૂકો, જીરુ, કાળા મરી પાઉડર, લીંબુનો રસ, ખાંડ તેમજ સમારેલી કોથમીર મેળવીને આ મિશ્રણને હાથેથી મિક્સ કરી લો. ત્યારબાદ મિશ્રણમાંથી ગોળા લઈ તેને બંને હાથમાં રોલ વાળીને લાંબી સ્ટીક બનાવી લો.

બધી સ્ટીક તૈયાર થાય એટલે તેલ ગરમ કરીને તેમાં ફરાળી ફ્રાઈસ કઢાઈમાં આવે તે કરતાં થોડી ઓછી ઉમેરીને ગેસની મધ્યમ આંચે સોનેરી રંગની તળી લો. (સાબુદાણાને લીધે આ ફ્રાઈસ થોડી ફુલશે તેથી કઢાઈમાં આવે તે કરતાં થોડી ઓછી ઉમેરીને તળવી)

બાળકોને આ ફ્રાઈસ ટોમેટો કેચ-અપ સાથે આપી શકાય.

૧૫ ઑક્ટોબર ૨૦૨૫

જેસલમેરમાં મુસાફરોથી ભરેલી બસમાં આગ લાગી, 20ના મોત

રાજસ્થાનના જેસલમેર જિલ્લામાં મંગળવારે એક મોટો અકસ્માત થયો. જેસલમેરથી જોધપુર જતી એક ખાનગી બસમાં યુદ્ધ સંગ્રહાલય પાસે આગ લાગી. બસ રસ્તા પર ભીષણ રીતે સળગી ગઈ, જેના કારણે અંદરના મુસાફરોમાં ગભરાટ ફેલાયો. બસમાં 57 મુસાફરો હતા. આ અકસ્માતમાં અત્યાર સુધીમાં 20 મુસાફરોના મોત થયા છે. ઘણા લોકો ગંભીર રીતે દાઝી ગયા હતા અને તેમને જવાહર હોસ્પિટલમાં દાખલ કરવામાં આવ્યા હતા. ઘણા લોકોની હાલત ગંભીર હોવાથી તેમને જોધપુર રિફર કરવામાં આવ્યા હતા. મુખ્યમંત્રી ભજન લાલ શર્માએ અકસ્માત પર દુ:ખ વ્યક્ત કર્યું અને ઘાયલોને યોગ્ય સારવાર આપવાનો આદેશ આપ્યો.


57 મુસાફરો સવાર હતા

જણાવ્યું છે કે બસ જેસલમેરથી જોધપુર જઈ રહી હતી. બસ યુદ્ધ સંગ્રહાલય પાસે પહોંચતા જ બસમાંથી અચાનક ધુમાડો નીકળવા લાગ્યો અને તે ઝડપથી આગમાં ભડકી ગઈ. અકસ્માત સમયે 57 મુસાફરો સવાર હતા. આગ લાગ્યા પછી, કેટલાક મુસાફરો બારીઓ અને દરવાજામાંથી બહાર નીકળી ગયા, પરંતુ અન્ય લોકો ફસાયેલા રહ્યા અને આગમાં ફસાઈ ગયા. અકસ્માતની જાણ રાહદારીઓએ તાત્કાલિક પોલીસ અને ફાયર બ્રિગેડને કરી.

માહિતી મળતા જ પોલીસ અને ફાયર બ્રિગેડની ટીમો ઘટનાસ્થળે પહોંચી ગઈ. ફાયર બ્રિગેડની ટીમે પહેલા બસમાં લાગેલી આગ ઓલવી, ત્યારબાદ ત્રણ એમ્બ્યુલન્સની મદદથી અંદરથી બળી ગયેલા મુસાફરોને જવાહર હોસ્પિટલમાં ખસેડ્યા. એવું જાણવા મળ્યું છે કે આશરે 30 દાઝી ગયેલા મુસાફરોને જવાહર હોસ્પિટલમાં દાખલ કરવામાં આવ્યા હતા. જેમાંથી 20 લોકોના મોત થયા હતા. બાકીના લોકો સારવાર હેઠળ છે, તેમની હાલત ગંભીર છે. કેટલાકને જોધપુર રિફર કરવામાં આવ્યા છે.

બિહાર ચૂંટણી: ભાજપે ઉમેદવારોની પહેલી યાદી જાહેર કરી

ભારતીય જનતા પાર્ટી (ભાજપ) એ 2025 બિહાર વિધાનસભા ચૂંટણી માટે ઉમેદવારોની પહેલી યાદી જાહેર કરી છે. પહેલી યાદીમાં નવ મહિલાઓ સહિત 71 ઉમેદવારોના નામનો સમાવેશ થાય છે. પાર્ટીના વરિષ્ઠ નેતાઓએ પટનામાં એક પત્રકાર પરિષદમાં ઉમેદવારોના નામની ઔપચારિક જાહેરાત કરી. NDAના મુખ્ય ઘટક તરીકે, ભાજપ આ વખતે જનતા દળ (યુનાઇટેડ) અને અન્ય સાથી પક્ષો સાથે જોડાણ કરીને ચૂંટણી લડશે. NDAમાં બેઠકોની વહેંચણી વ્યવસ્થા હેઠળ, ભાજપ 101 બેઠકો પર ચૂંટણી લડશે.

 

કતાર એરવેઝની ફ્લાઇટનું અમદાવાદમાં ઈમરજન્સી લેન્ડિંગ

દોહાથી હોંગકોંગ જતી કતાર એરવેઝની ફ્લાઇટ Qr816 એ મંગળવારે બપોરે અમદાવાદ એરપોર્ટ પર ઇમરજન્સી લેન્ડિંગ કર્યું. ફ્લાઇટ સવારે 9 વાગ્યે દોહાના હમાદ એરપોર્ટથી રવાના થઈ અને બપોરે 2:40 વાગ્યે અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર લેન્ડ થઈ.

એરપોર્ટ અધિકારીઓએ જણાવ્યું કે હવામાં ટેકનિકલ સમસ્યાને કારણે સાવચેતીના પગલા તરીકે ફ્લાઇટને અમદાવાદ ડાયવર્ટ કરવામાં આવી હતી. અધિકારીએ જણાવ્યું કે વિમાન સુરક્ષિત રીતે ઉતર્યું. ફ્લાઇટ ફરી શરૂ કરવાનો નિર્ણય સંપૂર્ણ તપાસ પછી જ લેવામાં આવશે.

કટોકટી જાહેર કરાઈ

એરપોર્ટ પ્રવક્તાના જણાવ્યા અનુસાર, સલામત ઉતરાણ સુનિશ્ચિત કરવા માટે બપોરે 2:12 વાગ્યે ફ્લાઇટ માટે સંપૂર્ણ કટોકટી જાહેર કરવામાં આવી હતી. લેન્ડિંગ પછી કટોકટી હટાવી લેવામાં આવી હતી. પ્રવક્તાએ જણાવ્યું કે સામાન્ય એરપોર્ટ કામગીરી પ્રભાવિત થઈ નથી.

1...530531532...5,147Page 531 of 5,147