Home Blog Page 787

શું આમિર ખાને તેની ગર્લફ્રેન્ડ ગૌરી સાથે લગ્ન કરી લીધા ?

આમિર ખાન તાજેતરમાં તેમની ફિલ્મ’સિતારે જમીન પર’દ્વારા દર્શકો તરફથી પ્રશંસા મેળવી રહ્યા છે. આ ફિલ્મ સુપરહિટ સાબિત થઈ છે. તો બીજી તરફ તેના જીવનમાં પ્રેમ પણ પ્રવેશી ગયો છે. આમિર ખાને આ વર્ષે તેના 60મા જન્મદિવસ પર તેની ગર્લફ્રેન્ડ ગૌરી સ્પ્રેટનો પરિચય કરાવ્યો. તાજેતરમાં તેણે તેના અને ગૌરીના લગ્ન વિશે વાત કરી.

આમિર ખાને તાજેતરમાં જ તેની ગર્લફ્રેન્ડ ગૌરી સ્પ્રેટ સાથેના તેના સંબંધો અને ત્રીજા લગ્નની શક્યતા વિશે ખુલીને વાત કરી હતી. ગૌરી સાથેના તેના લગ્ન વિશે વાત કરતા, આમિરે કહ્યું,”મારા હૃદયમાં, હું પહેલાથી જ ગૌરી સાથે લગ્ન કરી ચૂક્યો છું. અમે એકબીજા પ્રત્યે ખરેખર ગંભીર છીએ. અમે એકબીજા પ્રત્યે પ્રતિબદ્ધ છીએ.” આમિરે વધુમાં કહ્યું કે તેઓ સમય જતાં આ સંબંધને ઔપચારિક બનાવવાનો નિર્ણય લેશે.

ગૌરી સાથેના પોતાના સંબંધો વિશે ઈન્ડિયન એક્સપ્રેસ સાથે વાત કરતા આમિર ખાને કહ્યું કે તે ગૌરી સાથે દિલથી લગ્ન કરી ચૂક્યો છે. તમને જણાવી દઈએ કે આમિરે પહેલા બે વાર લગ્ન કર્યા છે, પરંતુ બંને લગ્ન અસફળ રહ્યા હતા. તેના પહેલા લગ્ન રીના દત્તા સાથે થયા હતા. તેના અને રીનાના 2002માં છૂટાછેડા થયા હતા. આમિર ખાનને રીનાથી બે બાળકો છે, જુનૈદ ખાન અને પુત્રી આયરા. જુનૈદ ખાને પણ હવે ઈન્ડસ્ટ્રીમાં ડેબ્યૂ કર્યું છે.

રીના દત્તાથી છૂટાછેડા પછી કિરણ રાવે આમિર ખાનના જીવનમાં પ્રવેશ કર્યો. બંનેએ 2005 માં લગ્ન કર્યા. પરંતુ, 2021 માં તેમના છૂટાછેડા થયા. કિરણ અને આમિર ખાનને એક પુત્ર આઝાદ રાવ ખાન છે. ગૌરી અને આમિર ખાન વચ્ચેના વયના તફાવત વિશે વાત કરીએ તો, મિસ્ટર પરફેક્શનિસ્ટ તેની ગર્લફ્રેન્ડ કરતા 14 વર્ષ મોટા છે. આમિર 60 વર્ષનો છે. તે જ સમયે, ગૌરી 46 વર્ષની છે.

આમિર ખાન હાલમાં ફિલ્મ ‘સિતારે જમીન પર’ ની સફળતાનો આનંદ માણી રહ્યા છે. આ ફિલ્મમાં તેની સાથે જેનેલિયા દેશમુખ પણ મુખ્ય ભૂમિકામાં જોવા મળી રહી છે. આમિરની આ ફિલ્મ 2018ની સ્પેનિશ ફિલ્મ ચેમ્પિયન્સની રિમેક છે.

શ્રીલંકન પોલીસ અધિકારીઓનું પ્રતિનિધિમંડળ રાષ્ટ્રીય રક્ષા યુનિવર્સિટીની મુલાકાતે

વીસ વરિષ્ઠ શ્રીલંકન પોલીસ અધિકારીઓના એક પ્રતિનિધિમંડળે ભારતના ગુજરાતના દહેગામમાં રાષ્ટ્રીય રક્ષા યુનિવર્સિટી (RRU)ની વ્યૂહાત્મક એક્સપોઝર મુલાકાતમાં ભાગ લીધો હતો. શ્રીલંકા સાથે ભારતના ચાલી રહેલા વિકાસ સહયોગના ભાગ રૂપે આયોજિત આ મુલાકાતે શ્રીલંકાના અધિકારીઓને RRU કાર્યો અને ભારતની અંદર રાષ્ટ્રીય સુરક્ષાને મજબૂત બનાવવામાં તેના યોગદાન વિશે સમજ આપી.

ભારત સરકારના વિદેશ મંત્રાલય (MEA)એ આ પહેલને સંપૂર્ણ ભંડોળ પૂરું પાડ્યું, જે સંસ્થાકીય જોડાણોને પ્રોત્સાહન આપવા અને પ્રાદેશિક સુરક્ષા સહયોગને પ્રોત્સાહન આપવાની ભારતની પ્રતિબદ્ધતા પર ભાર મૂકે છે.

ગૃહ મંત્રાલય (MHA) હેઠળ રાષ્ટ્રીય મહત્વની સંસ્થા, RRU દ્વારા અમલમાં મુકાયેલ આ કાર્યક્રમ રાષ્ટ્રીય અને આંતરિક સુરક્ષા શિક્ષણ, તાલીમ અને સંશોધનમાં યુનિવર્સિટીની કુશળતા દર્શાવવા પર કેન્દ્રિત હતો. આ મુલાકાતનો ઉદ્દેશ્ય સુરક્ષાના મહત્વપૂર્ણ ક્ષેત્રમાં બંને રાષ્ટ્રો વચ્ચે જ્ઞાનના આદાનપ્રદાન અને સહયોગને સરળ બનાવવાનો હતો. આ મુલાકાત ભારત અને શ્રીલંકા વચ્ચેના મજબૂત દ્વિપક્ષીય સંબંધો અને પ્રાદેશિક સ્થિરતા અને સહયોગ પ્રત્યેની તેમની સહિયારી પ્રતિબદ્ધતાનો પુરાવો છે.

7 અને 8 જુલાઈ, 2025ના રોજ યોજાનારી મુલાકાતના પ્રારંભિક તબક્કામાં RRU ફેકલ્ટી સાથે વ્યાપક વાર્તાલાપનો સમાવેશ થયો હતો. આ સત્રોમાં પોલીસિંગમાં શ્રેષ્ઠ પ્રથાઓ, આતંકવાદ વિરોધી વ્યૂહરચનાઓ, સાયબર ક્રાઇમ તપાસ તકનીકો, જેલ વ્યવસ્થાપન પ્રોટોકોલ, નેતૃત્વ વિકાસ અને આધુનિક પોલીસિંગ તકનીકોનો ઉપયોગ સહિત વિવિધ મહત્વપૂર્ણ ક્ષેત્રોનો સમાવેશ થતો હતો.

મુલાકાતમાં ભાગ લેનારા મુખ્ય RRU અધિકારીઓમાં પ્રો.ડૉ. કલ્પેશ એચ. વાન્દ્રા, પ્રો-વાઈસ ચાન્સેલર ડૉ. ધર્મેશકુમાર પ્રજાપતિ, રજિસ્ટ્રાર ડૉ. જસબીરકૌર થધાની, યુનિવર્સિટી ડીન અને રવિશ શાહ, ડિરેક્ટર, ઇન્ટરનેશનલ કોઓપરેશન એન્ડ રિલેશન્સ બ્રાન્ચનો સમાવેશ થતો હતો. આ મુલાકાતે રાષ્ટ્રીય સુરક્ષાના ક્ષેત્રમાં આંતરરાષ્ટ્રીય સહયોગ અને કુશળતા સેર કરવા માટે RRUની પ્રતિબદ્ધતા પર ભાર મૂક્યો.

RRUના પ્રો-વાઈસ ચાન્સેલર, પ્રો. ડૉ. કલ્પેશ એચ. વાન્દ્રાએ કહ્યું કે, “શ્રીલંકાના પોલીસ અધિકારીઓની વ્યૂહાત્મક મુલાકાત તેમને યુનિવર્સિટીના વિઝન અને મિશનને સમજવામાં મદદ કરશે અને તે રાષ્ટ્રની અન્ય પરંપરાગત યુનિવર્સિટીઓથી કેવી રીતે અલગ છે.”  જ્યારે, ડૉ. નીરજા ગોત્રુ, IPS, DGP અને ગુજરાત પોલીસ ભરતી બોર્ડ અને તાલીમના અધ્યક્ષ, એ આતંકવાદ વિરોધી વ્યૂહરચના પર તેમની કુશળતા સેર કરી અને RRU અને ગુજરાત પોલીસ વચ્ચેના પાયલોટ પ્રોજેક્ટની ચર્ચા કરી. યગામા ઈન્ડિકા ડી’સિલ્વા, સંરક્ષણ અટેચી, શ્રીલંકા અને ભારત વચ્ચેના દ્વિપક્ષીય સંબંધોના મહત્વ પર પ્રકાશ પાડ્યો.

આ મુલાકાતે શ્રીલંકાના અધિકારીઓને RRUના કાર્યકારી માળખા અને રાષ્ટ્રીય સુરક્ષામાં તેના યોગદાન વિશે સમજ મેળવવાની તક પૂરી પાડી. ફેકલ્ટી સભ્યો સાથેની વાતચીતનો ઉદ્દેશ્ય યુનિવર્સિટીના વિઝન અને મિશનની ઊંડી સમજણને સરળ બનાવવાનો હતો, જે પરંપરાગત શૈક્ષણિક સંસ્થાઓની તુલનામાં તેના વિશિષ્ટ અભિગમને પ્રકાશિત કરે છે.

9 થી 11 જુલાઈ, 2025 સુધી, શ્રીલંકન પ્રતિનિધિમંડળ ગૃહ મંત્રાલય (MHA) હેઠળના મુખ્ય ભારતીય કાયદા અમલીકરણ અને આંતરિક સુરક્ષા એજન્સીઓ સાથે વાતચીત માટે નવી દિલ્હીમાં રહેશે. આ એજન્સીઓમાં રાષ્ટ્રીય આપત્તિ પ્રતિભાવ દળ (NDRF), કેન્દ્રીય.

બ્યુરો ઓફ ઇન્વેસ્ટિગેશન (CBI), નેશનલ સિક્યુરિટી ગાર્ડ (NSG), નેશનલ ઇન્વેસ્ટિગેશન એજન્સી (NIA), સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF), બોર્ડર સિક્યુરિટી ફોર્સ (BSF), અને દિલ્હી પોલીસ. આ તબક્કાનો ઉદ્દેશ્ય સુરક્ષા અને કાયદા અમલીકરણના વિવિધ પાસાઓમાં અર્થપૂર્ણ સહયોગ અને જ્ઞાનના આદાનપ્રદાનને પ્રોત્સાહન આપવાનો છે.

RRUમાં વરિષ્ઠ અધિકારીઓની મુલાકાત આંતરરાષ્ટ્રીય શ્રેષ્ઠ પ્રથાઓ અને અદ્યતન તાલીમ પદ્ધતિઓના સંપર્ક દ્વારા શ્રીલંકન પોલીસ દળની ક્ષમતાઓ અને અસરકારકતા વધારવાની પ્રતિબદ્ધતા દર્શાવે છે.

RRUની મુલાકાતે શ્રીલંકાના અધિકારીઓને આધુનિક પોલીસિંગ વ્યૂહરચનાઓ અને તકનીકોમાં સમજ મેળવવા, બંને દેશો વચ્ચે સહયોગ અને જ્ઞાન વહેંચણીને પ્રોત્સાહન આપવાની મૂલ્યવાન તક પૂરી પાડી.

રાષ્ટ્રીય રક્ષા યુનિવર્સિટી (RRU) વિશે

રાષ્ટ્રીય રક્ષા યુનિવર્સિટી રાષ્ટ્રીય સુરક્ષા અને પોલીસ વહીવટના ક્ષેત્રમાં શિક્ષણ, સંશોધન અને તાલીમ માટે સમર્પિત એક અગ્રણી સંસ્થા છે. RRU સમકાલીન સુરક્ષા પડકારોનો સામનો કરવા માટે સજ્જ કુશળ વ્યાવસાયિકો અને નેતાઓ વિકસાવવામાં મહત્વપૂર્ણ ભૂમિકા ભજવે છે. આ યુનિવર્સિટી સુરક્ષા કર્મચારીઓની ક્ષમતાઓને વધારવા અને ભારતના એકંદર સુરક્ષા માળખામાં યોગદાન આપવા માટે રચાયેલ શૈક્ષણિક કાર્યક્રમો અને તાલીમ અભ્યાસક્રમોની વિશાળ શ્રેણી પ્રદાન કરે છે.

શ્રીલંકા પોલીસ વિશે

શ્રીલંકા પોલીસ શ્રીલંકામાં પ્રાથમિક કાયદા અમલીકરણ એજન્સી છે, જે કાયદો અને વ્યવસ્થા જાળવવા, ગુના અટકાવવા અને નાગરિકોની સલામતી અને સુરક્ષા સુનિશ્ચિત કરવા માટે જવાબદાર છે. પોલીસ દળ વિવિધ વિભાગો અને એકમોથી રચાયેલ છે જે કાયદા અમલીકરણના વિવિધ પાસાઓનું સંચાલન કરે છે, જેમાં ગુનાહિત તપાસ, ટ્રાફિક વ્યવસ્થાપન અને આતંકવાદ વિરોધીનો સમાવેશ થાય છે.

બિહારના ગોપાલ ખેમકા હત્યા કેસનો ખુલાસો

પટના: પટનામાં જાણીતા વેપારી ગોપાલ ખેમકાની તેમના ઘરના બહાર અજાણ્યા ગુનેગારો દ્વારા ગોળી મારીને હત્યા કરી દેવામાં આવી હતી. આ હત્યાના આ ઘટનાક્રમ બાદ બિહારમાં રાજકીય ગરમાવો વધી ગયો છે અને વિપક્ષ સતત નીતીશ સરકાર પર હુમલો કરી રહ્યો છે. આજે બિહાર પોલીસ દ્વારા આ હત્યાકાંડ સંબંધિત દરેક કડી અને દરેક સત્યનો ખુલાસો કરવામાં આવ્યો છે.

પટનામાં DGPએ ઉચ્ચ અધિકારીઓ સાથે પત્રકાર પરિષદમાં જણાવ્યું હતું કે હત્યાની તપાસ માટે વિશેષ તપાસ ટીમ (SIT) બનાવવામાં આવી હતી અને તપાસમાં અનેક ખુલાસાઓ થયા છે.

જમીન વિવાદ હત્યાનું કારણ
પોલીસના જણાવ્યાનુસાર ગોપાલ ખેમકાની હત્યાનું મુખ્ય કારણ જમીનનો વિવાદ હતું. આ હત્યાકાંડનો માસ્ટરમાઈન્ડ અશોક સાવ છે. એણે જ ગોપાલ ખેમકાની હત્યા કરાવવાની યોજના ઘડી હતી. પટના પોલીસે એક એન્કાઉન્ટરમાં વિકાસ ઉર્ફે રાજા નામના આરોપીની હત્યા કરી છે. માલ સલામી વિસ્તારમાં રાત્રે 2:45 વાગે થયેલી અથડામણમાં રાજાની હત્યા થઈ હતી. પોલીસના જણાવ્યા પ્રમાણે, રાજાના શૂટર ઉમેશ યાદવ સાથે સંબંધ હતા. ઘટનાસ્થળેથી પોલીસને એક પિસ્તોલ, કારતૂસ અને ખોખાં મળ્યાં છે. રાજાએ જ ખેમકાની હત્યા માટે શૂટર ઉમેશને હથિયાર આપ્યાં હતાં.

શૂટર ઉમેશ યાદવે લીધી હતી ખેમકાની સુપારી

એક દિવસ પહેલાં પોલીસે ઉમેશ યાદવ નામના શૂટરને માલ સલામી વિસ્તારમાંથી પકડી પાડ્યો હતો. ઉમેશની માહિતીને આધારે STF અને પટના પોલીસે સાથે મળીને કોઠવાલી પોલીસ સ્ટેશનની નજીક આવેલ ઉદયગિરી એપાર્ટમેન્ટમાં દરોડા પાડ્યા હતા. ઉમેશે જ ગોપાલ ખેમકાની હત્યાની સુપારી લીધી હતી. પોલીસે ગંગાના કિનારેથી હથિયાર પણ જપ્ત કર્યાં છે.

સેકન્ડ શિફ્ટઃ મહિલાની અવાજ વિહોણી લડત

સંસ્કૃતિ 35 વર્ષની મધ્યમવર્ગીય મહિલા સવારે નવ વાગ્યે ઓફિસે જાય છે. બેંકમાં ક્લાર્ક તરીકે આખો દિવસ ગ્રાહકોની ભીડ, કાગળોની ફાઇલો અને ડેડ લાઇન્સની દોડધામમાં પૂર્ણ થાય. સાંજે છ વાગે ઘરે પહોંચે ત્યારે એની બીજી શિફ્ટ શરૂ થાય. રસોડામાં રાત્રિનું ભોજન બનાવવું, બે નાના બાળકોના હોમવર્ક, ઘરની સફાઈ, સવારે ઉતાવળમાં બાકી રહેલા કામ, પરિવારની નાની-મોટી જરૂરિયાત પૂરી કરવી આ બધું એના શિરે.

સંસ્કૃતિનો પતિ સુજલ ઓફિસેથી આવીને ટીવી સામે બેસી જાય, પણ સંસ્કૃતિને આરામની એક ક્ષણ પણ નથી મળતી. એની બે વર્ષની દીકરી રીયા, એની સાથે રમવાની જીદ કરે, જ્યારે આઠ વર્ષનો દીકરો આરવ ગણિતના પ્રશ્નો પૂછે. સસરાને વહેલા જમવા જોઈએ. સાસુમાને જમતા પહેલાં દવા આપવાની. નાની બાબતોમાં એમની સલાહ લેવાની. આ બધું સંસ્કૃતિ ખામોશીથી નિભાવે છે. જેના માટે ન તો એને પગાર મળે છે, ન તો કોઈ પ્રશંસા, છતાં એ રોજ આ બીજી શિફ્ટ પૂરી કરે છે.

ઘણીવાર રાત્રે બધું પૂરું કરીને એ નવરી પડે ત્યારે ઘડિયાળમાં 12 ટકોરા થાય. એ સવારે પાંચનું એલાર્મ મૂકી આંખો મીચે. આ મહિલાની આંખોમાં થોડી નિરાશા અને થોડો સંતોષ હોય છે. નિરાશા એટલે કે પોતાનો થાક, પોતાની સ્થિતિ કોઈ જોઈ ન શક્યું, અને સંતોષ એટલે પરિવારની ખુશ જોવાનો.

સંસ્કૃતિ જેવી અનેક મહિલાઓની આ સેકન્ડ શિફ્ટ એક અવાજ વિહોણી લડત છે, જે તેઓ રોજ ખામોશીથી લડે છે, પોતાના પરિવાર માટે, પોતાની જવાબદારીઓ માટે. શું મહિલાઓની આ સેકન્ડ શિફ્ટ વિશે ક્યારેય કોઈ વિચારે છે?

 ..તો મહિલાઓને સેકન્ડ શિફ્ટનો બોજ ઉઠાવવો નહીં પડે

ડૉ. જાગૃતિ કોઠારી જણાવે છે કે, પહેલાંના સમયમાં પુરુષ બહારનું કામ સંભાળતો અને સ્ત્રી ઘરનું વ્યવસ્થાપન કરતી, જેથી ઘરની વ્યવસ્થા સુચારુ રહે. પરંતુ આજના સમયમાં આર્થિક જવાબદારી અને ખર્ચાઓ એટલા વધી ગયા છે કે એકલા પુરુષની કમાણીથી સંસાર ચાલતો નથી. આથી મહિલાઓએ પણ નોકરી કરીને આર્થિક રીતે પરિવારને ટેકો આપવો પડે છે. જોકે, આ નવી ભૂમિકા ઉમેરાયા પછી પણ ઘરના કામોની જવાબદારી મુખ્યત્વે મહિલાઓ પર જ રહે છે, જેનાથી તેમની ‘સેકન્ડ શિફ્ટ’ શરૂ થાય છે.

ડો. જાગૃતિ કોઠારી કહે છે કે, “જો પતિ-પત્ની બંને નોકરી કરતા હોય અને પતિ વહેલો ઘરે આવે, તો એ આરામ કરે છે. પરંતુ જ્યારે પત્ની ઘરે પહોંચે,  ત્યારે એને સૌથી પહેલા ચા બનાવવી પડે છે, અને પછી બંને સાથે ચા પીવે. જો પતિ વહેલા આવે, તો પણ એ ચા બનાવવાનું વિચારતો નથી. આનું કારણ એ છે કે સમાજે અને ખાસ કરીને માતાઓએ પુરુષોને ઘરકામમાં સહભાગી થવાનું શીખવ્યું નથી. જેમ મહિલા આર્થિક રીતે પરિવારને મદદ કરે છે, એમ પુરુષે પણ ઘરના કામમાં સહયોગ આપવો જોઈએ. આ પરિસ્થિતિ બદલવા માટે માતાએ પોતાના પુત્રોને નાનપણથી જ ઘરકામની તાલીમ આપવી જોઈએ. જો પુરુષ ઘરના કામમાં સમાન ભૂમિકા નિભાવે તો મહિલાઓને સેકન્ડ શિફ્ટનો બોજ ઉઠાવવો નહીં પડે.”

આ મુશ્કેલીનો હલ છે!

મહિલાઓ માટે સેકન્ડ શિફ્ટ એટલે ઓફિસ પછી ઘરના કામનો પડકારજનક તબક્કો. આત્મનિર્ભરતા માટે નોકરી કરતી મહિલાઓ ઘરે પહોંચે ત્યારે રસોડું, બાળકો અને પરિવારની જવાબદારીઓનો બોજ ઉઠાવે છે, જેનાથી શારીરિક-માનસિક થાક અનુભવાય. આ ઉપરાંત, પરિવાર અને મિત્રો સાથે સમય ઓછો મળવાથી સંબંધોમાં તણાવ આવે છે. સામાજિક પ્રસંગમાં હાજરી ઘટે છે. આ બધામાં પોતાના સ્વાસ્થ્યની અવગણના થાય છે, અને નારીવાદનો ટેગ જાળવવા મુશ્કેલીઓનો સામનો કરવો પડે છે.

આ વિશે ચિત્રલેખા.કોમ સાથે વાત કરતા નેઇલ આર્ટીસ્ટ જીનલ પટેલ કહે છે કે “મહિલાઓએ આ મુશ્કેલીનો ઉકેલ શોધી શકે છે.  આજની મહિલાઓ પતિ કે પરિવારના સભ્યોની મદદ લઈ, બાળકો માટે કેરટેકરનો ઉપયોગ કરી, કામના કલાકો ઘટાડતી સંસ્થાઓ સાથે જોડાઈને જવાબદારીઓ વહેંચે છે. બજેટ બનાવી આર્થિક તણાવ ઘટાડે છે, સ્વાસ્થ્ય માટે સારી આદતો અપનાવે છે. પારિવારિક સહયોગ અને ધૈર્યથી મહિલાઓ આ અવાજવિહોણી લડત જીતી શકે છે, જેનાથી તેઓ ઘર અને કાર્યસ્થળ બંનેમાં સંતુલન જાળવી, આત્મનિર્ભરતા અને નારીવાદને સાચા અર્થમાં ન્યાય આપે.”

મહિલાને સહયોગ આપવો પરિવારની જવાબદારી

મહિલાઓના જીવનમાં ઘરકામ, નોકરી અને જવાબદારીઓ અભિન્ન અંગ બની ગયા છે. આ બધું હસતા મોઢે કરવાનું દબાણ ઓફિસ, ઘર અને સમાજ તરફથી સતત રહે છે. ઓફિસના થાકેલા દિવસ પછી ઘરે પહોંચતા પણ રસોડું, બાળકોની સંભાળ અને ઘરના કામોની જવાબદારી મહિલા પર જ આવે છે. આધુનિક યુગમાં પણ ઘણી જગ્યાએ આ વિચારધારા બદલાઈ નથી, જે મહિલાઓની સેકન્ડ શિફ્ટને વધુ ભારે બનાવે છે.

એલઆઈસીમાં કામ કરતાં પલ્લવી મકવાણા ચિત્રલેખા.કોમને કહે છે કે, પરિવાર, ખાસ કરીને પતિએ એ  સમજવું જરૂરી છે કે ઘરની સ્ત્રી પછી એ દીકરી, માતા, બહેન, ભાભી કે પત્ની હોય. જ્યારે બહાર જઈને નોકરી કરે છે અને પરિવારને આર્થિક ટેકો આપે છે, ત્યારે એની સેકન્ડ શિફ્ટનો બોજ હળવો કરવો એ પરિવારની જવાબદારી છે. પુરુષ અને ઘરના અન્ય સભ્યોએ ઘરકામમાં સહયોગ આપવો જોઈએ. આ સહયોગથી મહિલાઓનો શારીરિક-માનસિક થાક ઘટશે. એમને પોતાના માટે સમય મળશે.”

જો પરિવાર સમાન જવાબદારી વહેંચે, તો સેકન્ડ શિફ્ટનો ખ્યાલ નાબૂદ થઈ શકે છે, અને મહિલાઓ ઘર-કાર્યસ્થળ બંનેમાં સંતુલન જાળવી, વધુ સશક્ત અને આનંદી જીવન જીવી શકશે.

હેતલ રાવ

પડદા પર જોવા મળશે બોલિવૂડની સ્ટાર પત્નીઓની વાર્તા, ‘ધ વાઇવ્સ’નું શૂટિંગ શરૂ

ફેશન અને ગ્લેમર ઈન્ડસ્ટ્રી પાછળની કહાની દર્શાવતા નિર્માતા-દિગ્દર્શક મધુર ભંડારકર હવે એક નવી ફિલ્મ લઈને આવી રહ્યા છે. આ ફિલ્મમાં તેઓ બોલિવૂડ સેલિબ્રિટીઓની પત્નીઓની વાર્તા બતાવવાનો પ્રયાસ કરશે. તેમની ફિલ્મ ‘ધ વાઇવ્સ’ બોલિવૂડની સૌથી ગ્લેમરસ મહિલાઓ પાછળના વણકહ્યા સત્યને ઉજાગર કરશે. આ ફિલ્મ આજથી ફ્લોર પર આવી ગઈ છે.

આ ફિલ્મની જાહેરાત આ વર્ષની શરૂઆતમાં નિર્માતાઓ દ્વારા કરવામાં આવી હતી.’ધ વાઇવ્સ’માં સોનાલી કુલકર્ણી, મૌની રોય, રેજીના કેસાન્ડ્રા, રાહુલ ભટ્ટ, સૌરભ સચદેવા, અર્જન બાજવા અને ફ્રેડી દારૂવાલા જેવા કલાકારો મુખ્ય ભૂમિકામાં જોવા મળશે. ફિલ્મનું શૂટિંગ આજથી શરૂ થઈ ગયું છે.

આ ફિલ્મ વિશે મધુર ભંડારકર કહે છે કે ‘ધ વાઇવ્સ’ દ્વારા હું સમાજના બીજા ગ્લેમરસ સ્તરને દૂર કરવા માંગુ છું અને તેની પાછળ ખરેખર શું છુપાયેલું છે તે બતાવવા માંગુ છું. આ ફિલ્મ ઘણીવાર જોવા મળતી પણ ભાગ્યે જ સાંભળવામાં આવતી મહિલાઓના રહસ્યો, સંઘર્ષો અને સ્થિતિસ્થાપકતા પર એક બોલ્ડ અને સ્પષ્ટ દૃષ્ટિકોણ રજૂ કરશે.

 

View this post on Instagram

 

A post shared by Madhur Bhandarkar (@imbhandarkar)

મધુર ભંડારકરે અગાઉ ‘ફેશન’,’ચાંદની બાર’, ‘હિરોઈન’ અને ‘પેજ 3’ જેવી તેમની ફિલ્મોમાં વિવિધ ઉદ્યોગોના ગ્લેમર પાછળની દુનિયા બતાવી છે. હવે તે બોલિવૂડ સ્ટાર પત્નીઓની ગ્લેમરસ દુનિયામાં પ્રવેશ કરી રહ્યા છે અને તેની પાછળની વાર્તા લાવી રહ્યા છે. એક એવી દુનિયા જે ગપસપ અને આશ્ચર્યજનક વૈભવીતાથી ભરેલી છે. ભંડારકરનો ધ્યેય લાઈમલાઈટ પાછળના સત્યને ઉજાગર કરવાનો છે. પીજે મોશન પિક્ચર્સના નિર્માતા પ્રણવ જૈન સાથે મધુર ભંડારકરનો આ બીજો પ્રોજેક્ટ છે. અગાઉ, તે બંને ઓટીટી પર ‘ઈન્ડિયા લોકડાઉન’ નામની ફિલ્મ લઈને આવ્યા છે. તેને ખૂબ પસંદ કરવામાં આવી હતી.

દેશ વિરુદ્ધ ઝેર ઓકનારા વિરુદ્ધ થઈ રહી છે, ડિજિટલ સ્ટ્રાઇક

નવી દિલ્હી: હવે દેશમાં માત્ર સરહદ પર જ નહીં, પરંતુ ડિજિટલ દુનિયામાં પણ દેશના દુશ્મનોને રોકવા માટે અભિયાન શરૂ થયું છે. આ અભિયાન છે — ઓપરેશન ડિજિટલ સ્ટ્રાઈક. દેશમાં ઝેર ઓકતા, નફરત ફેલાવતા અને આતંકવાદી પ્રચારકામ કરનારા અનેક સોશિયલ મિડિયા એકાઉન્ટ્સ પર NIA (નેશનલ ઇન્વેસ્ટિગેશન એજન્સી) અને અન્ય ગુપ્તચર એજન્સીઓ કડક કાર્યવાહી કરી રહી છે. આમાં માત્ર ભારતમાં રહેલા લોકો નહીં, પરંતુ પાકિસ્તાન, ચીન, ખાલિસ્તાન સમર્થક જૂથો, ISISના પ્રચારક અને વિદેશમાં બેઠેલા ગેંગસ્ટરો પણ સામેલ છે.

NIA પાસે એક વિશિષ્ટ ટીમ છે, જે 24×7 સોશિયલ મિડિયા પર નજર રાખે છે. આ ટીમ ફેસબુક, ઇન્સ્ટાગ્રામ, X (ટ્વિટર), યુટ્યુબ, ટેલિગ્રામ અને વોટ્સએપ જેવી તમામ મોટી સોશિયલ મિડિયા પ્લેટફોર્મ્સ પર દેશ વિરુદ્ધના કન્ટેન્ટને AI ટૂલ્સ દ્વારા સ્કેન કરે છે. AI અલ્ગોરિધમ્સની મદદથી કોઈ પણ પોસ્ટ, વિડિયો કે મેસેજમાં આતંકવાદી વિચારધારા, ખોટી માહિતી, સાંપ્રદાયિક ઉશ્કેરણી આપતી પોસ્ટ, દેશદ્રોહ કે અશ્લીલ સામગ્રી શોધી કાઢવામાં આવે છે અને ત્યાર બાદ તરત પગલાં લેવામાં આવે છે.

શંકાસ્પદ એકાઉન્ટ્સના પોસ્ટ્સ, મેસેજીસ, શેરિંગ ઇતિહાસ, IP એડ્રેસ વગેરેનો રેકોર્ડ તૈયાર કરવામાં આવે છે. સ્ક્રીનશોટ્સ, લિંક્સ અને ટેક્નિકલ મેટાડેટા સાચવી લેવામાં આવે છે જેથી પછી કોર્ટ કે કંપનીઓને રજૂ કરી શકાય. એજન્સીઓ મેટા, X, યુટ્યુબ અને ટેલિગ્રામ જેવી કંપનીઓને બ્લોકિંગ રિક્વેસ્ટ મોકલે છે. આ રિક્વેસ્ટસ ભારતના કાયદાની વિવિધ કલમો હેઠળ મોકલવામાં આવે છે. ઘણા કેસમાં ગૃહ મંત્રાલય મારફતે પણ એકાઉન્ટ બ્લોક કરાવવામાં આવે છે.

NIA આ બધા પર ખાસ નજર રાખી રહી છે. વર્ષ 2014માં જ્યાં ફક્ત 471 એકાઉન્ટ/URL બ્લોક કરવામાં આવ્યા હતા, ત્યાં 2023માં આ આંકડો 12,483 સુધી પહોંચી ગયો હતો. 2024માં સપ્ટેમ્બર સુધીમાં જ 8821 લિંક્સ અથવા એકાઉન્ટ બ્લોક કરવામાં આવ્યા છે. પ્લેટફોર્મ પ્રમાણે જોવામાં આવે તો 2021થી 2024 વચ્ચે ફેસબુક પર 11,000, X (ટ્વિટર) પર 10,139, યુટ્યુબ પર 2200, ઇન્સ્ટાગ્રામ પર 2198 જેટલી URLs બ્લોક થઈ છે. જ્યારે વોટ્સએપ અને ટેલિગ્રામ પર પણ સેંકડો ગ્રુપ અને એકાઉન્ટ્સ બંધ કરાયા છે.

ઓપરેશન સિંદૂર: પાકિસ્તાનના સોશિયલ મીડિયા પર સૌથી મોટો પ્રહાર
હમણાં જ થયેલા ઓપરેશન સિંદૂર દરમિયાન લગભગ 8,000 પાકિસ્તાની સોશિયલ મીડિયા એકાઉન્ટ્સને બ્લોક કરવામાં આવ્યા હતા. આ એકાઉન્ટ્સ ભારતમાં ધાર્મિક નફરત ફેલાવવાનો, ખોટા વીડિયો દ્વારા દંગલ ભડકાવવાનો અને દેશવિરુદ્ધ વાતાવરણ બનાવવા માટે પ્રયાસ કરી રહ્યાં હતા.

મનસે નેતાના પુત્ર પર ગંભીર આરોપ લગાવનાર રાજશ્રી મોરે કોણ છે?

સોશિયલ મીડિયા ઇન્ફ્લુએન્સર અને નેઇલ આર્ટિસ્ટ રાજશ્રી મોરે આ દિવસોમાં એક ચોંકાવનારી ઘટનાને કારણે સમાચારમાં છે. તેમણે મનસે ઉપાધ્યક્ષના પુત્ર સામે મોરચો ખોલ્યો છે. રવિવારે મોડી રાત્રે અંધેરી વિસ્તારમાં તેમની સાથે થયેલા રોડ અકસ્માત અને ધમકીભર્યા બનાવથી રાજકારણથી લઈને સોશિયલ મીડિયા સુધી હોબાળો મચી ગયો છે.

રાજશ્રી મોરેએ પોલીસ ફરિયાદ નોંધાવી છે કે મહારાષ્ટ્ર નવનિર્માણ સેના (MNS) ના ઉપાધ્યક્ષ જાવેદ શેખના પુત્ર રાહિલ શેખે નશાની હાલતમાં વારંવાર તેમની કારને ટક્કર મારી હતી અને તેમની સાથે દુર્વ્યવહાર કર્યો હતો. આ ઘટના ત્યારે બની જ્યારે રાજશ્રી મોરે ગોરેગાંવથી અંધેરી જઈ રહ્યા હતા. તેમણે કહ્યું કે રાહિલ અર્ધનગ્ન હતો અને તેના કાર્યો અત્યંત વાંધાજનક હતા. રાહિલ પોલીસની હાજરીમાં તેમને ધમકાવતો હતો અને તેમના પિતાના રાજકીય દરજ્જાનો હવાલો આપીને તેમને પાઠ ભણાવવાની ધમકી આપતો હતો.

વાયરલ વીડિયોમાં આખી ઘટનાની ઝલક જોવા મળી હતી

આ ઘટનાનો વીડિયો સોશિયલ મીડિયા પર પણ વાયરલ થયો છે, જેમાં રાજશ્રી મોરે આખી ઘટના ઇન્સ્ટાગ્રામ પર શેર કરતી જોવા મળી રહી છે અને ભાવુક જોવા મળી રહી છે. તેણીએ કહ્યું કે તે અસુરક્ષિત અનુભવી રહી હતી અને જ્યારે પોલીસ કોન્સ્ટેબલ તેને મદદ કરવા માટે કારમાં બેઠો ત્યારે રાહિલે ફરીથી કારને ટક્કર મારી.

આ કેસમાં FIR નોંધાઈ

આ કેસમાં રાહિલ શેખ સામે ભારતીય દંડ સંહિતા (IPC) ની અનેક કલમો હેઠળ કેસ નોંધવામાં આવ્યો છે. આમાં કલમ 79 (મહિલાની નમ્રતાને ઠેસ પહોંચાડવાનો પ્રયાસ), કલમ 281 (બેદરકારીપૂર્વક વાહન ચલાવવું) અને કલમ 125 અને 185 (દારૂ પીને વાહન ચલાવવું)નો સમાવેશ થાય છે.

રાજશ્રી મોરે કોણ છે?

રાજશ્રી મોરે એક સૌંદર્ય અને ફેશન ઈન્ફ્લુએન્સર છે જે લોખંડવાલામાં પોતાનો નેઇલ આર્ટ સ્ટુડિયો ચલાવે છે. ઇન્સ્ટાગ્રામ પર તેના 31 હજારથી વધુ ફોલોઅર્સ છે અને તે ઘણી બોલિવૂડ સેલિબ્રિટીઝ સાથે વીડિયો પણ બનાવી રહી છે. તાજેતરમાં, તેણીએ એક વીડિયોમાં મરાઠી ભાષા લાદવાની ટીકા કરી ત્યારે તે વિવાદમાં પણ ફસાઈ. આ નિવેદન પછી MNS સમર્થકોએ તેની સામે ફરિયાદ નોંધાવી. જો કે, બાદમાં તેણીએ વીડિયો દૂર કર્યો અને માફી પણ માંગી.

રાજશ્રી મોરે વિશે વાત કરીએ તો, તે 8 વર્ષથી તેના વ્યાવસાયિક જીવનમાં સક્રિય છે. તેનો જન્મ મહારાષ્ટ્રના રત્નાગિરીમાં થયો હતો અને તે લાંજાની રહેવાસી છે. તેણીએ મરાઠી શાળામાં અભ્યાસ કર્યો હતો પરંતુ મોડેલના મતે, તે હાઇસ્કૂલ પાસ કરી શકી ન હતી. તેના અંગત જીવન વિશે વાત કરીએ તો, રાજશ્રીએ હજુ સુધી લગ્ન કર્યા નથી અને તે સિંગલ છે.

શરૂઆતનું જીવન સંઘર્ષોથી ભરેલું હતું

રાજશ્રીની શરૂઆતની સફર મુશ્કેલીઓથી ભરેલી હતી. તેના પિતા ટ્રાન્સપોર્ટમાં કામ કરતા હતા, પરંતુ રાજશ્રી માત્ર 16 વર્ષની હતી ત્યારે તેમનું અવસાન થયું. હાલમાં તેના પરિવારમાં તેની માતા,એક મોટો ભાઈ અને એક મોટી બહેન છે.

કારકિર્દીની વાત કરીએ તો રાજશ્રીએ નેઇલ આર્ટ સ્ટુડિયો શરૂ કર્યો. આ ઉપરાંત તે મુંબઈના મલાડના એવરશાઇન નગરમાં એક બ્યુટી પાર્લર પણ ચલાવે છે. તેને આ કામ શરૂ કરવાની પ્રેરણા લક્ષ્મી નામના બ્યુટિશિયન પાસેથી મળી. આજે તેની પાસે આ પાર્લરની બે વધુ શાખાઓ પણ છે અને બંને સારી કમાણી કરી રહી છે.

આ પહેલા પણ વિવાદોમાં રહી છે

નોંધનીય છે કે આ પહેલી વાર નથી કે રાજશ્રી કોઈ વિવાદમાં ફસાઈ હોય, આ પહેલા પણ રાજશ્રી તેની મિત્ર રાખી સાવંત અને તેના પૂર્વ પતિ આદિલના મામલામાં ફસાઈને ઘણી હેડલાઇન્સ બનાવી ચૂકી છે. રાજશ્રીએ રાખી સાવંતના પતિ આદિલ પર ઘણા ગંભીર આરોપો લગાવ્યા હતા, જેના પછી તે થોડા સમય માટે તેની મિત્ર રાખી વિરુદ્ધ થઈ ગઈ હતી.

ગુજરાતમાં ધમધોકાર વરસાદ, 29 ડેમ હાઈ એલર્ટ પર

ગુજરાતમાં છેલ્લા કેટલાક દિવસોથી ભારે વરસાદને પગલે અત્યાર સુધીમાં રાજ્યના કુલ 29 ડેમ હાઈએલર્ટ પર છે અને સૌરાષ્ટ્ર-કચ્છના 19 ડેમ 100 ટકા ભરાઈ ગયા છે. જ્યારે છોટાઉદેપુર નેશનલ હાઈવે બપોરે બંધ કરવો પડ્યો હતો. એસ.ટી બસોને અસર થતા 11 રૂટ બંધ કરાયા હતા અને 34 ટ્રીપો કેન્સલ થઈ હતી. જ્યારે 1 જુલાઈથી 6 જુલાઈ સુધીમાં કુલ 3700થી વધુ લોકોનું સ્થળાંતર કરવામા આવ્યુ હતું.

માછીમારોને 10 જુલાઈ સુધી દરિયો ન ખેડવા ચેતવણી 

ગુજરાતમાં હાલ વિવિધ 33 જિલ્લામાં કુલ 13 એનડીઆરએફ ટીમો તૈનાત છે અને 20 એસડીઆરએફ ટીમો તૈનાત છે.બે એનડીઆરએફ ટીમ રીઝર્વ રખાઈ છે. ગુજરાતના માછીમારોને 10 જુલાઈ સુધી દરિયો ન ખેડવા ચેતવણી અપાઈ છે. ભારે વરસાદને પગલે વીજપુરવઠાને અસર થતા 14332 ગામોમાં અસર થઈ હતી અને 20292 થાંભલા અને 1073 ટ્રાન્સફોર્મર સેન્ટરો તથા 20111 ફીડર્સને અસર થઈ હતી. ભારે વરસાદને પગલે વડોદરા સ્ટેટ હાઈવે અને છોટાઉદેપુર નેશનલ હાઈવે બંધ કરવો પડયો હતો.’ બપોરે 2 વાગ્યા સુધીમાં 8 અન્ય માર્ગો અને જિલ્લા-તાલુકા-ગ્રામ પંચાયતોના 249 માર્ગો વાહન વ્યવહાર માટે બંધ કરાયા હતા.

એસ.ટી બસોના 11 રૂટ બંધ કરાયા હતા અને 34 ટ્રીપો કેન્સલ થઈ

એસ.ટી બસોના 11 રૂટ બંધ કરાયા હતા અને 34 ટ્રીપો કેન્સલ થઈ હતી. હાલ રાજ્યમાં કુલ 206 ડેમ-જળાશયોમાંથી 29 ડેમ હાઈએલર્ટ પર છે અને 17 એલર્ટ પર તથા 17 વોર્નિંગ મોડ પર છે. કુલ 20 ડેમ 100 ટકા ભરાયા છે. જેમાં 19 સૌરાષ્ટ્ર-કચ્છના છે અને 1 તાપીનો છે. 43 ડેમ 70થી 100 ટકા તેમજ 46 ડેમ 25 થી 50 ટકા વચ્ચે અને 48 ડેમ 25 ટકાથી ઓછા ભરાયા છે.

મલ્લિકાર્જુન ખડગેનું રાષ્ટ્રપતિ મુર્મુ વિશે વિવાદસ્પદ નિવેદન

ભાજપનો આરોપ છે કે કોંગ્રેસ પ્રમુખ મલ્લિકાર્જુન ખડગેએ રાષ્ટ્રપતિ દ્રૌપદી મુર્મુ વિરુદ્ધ વાંધાજનક શબ્દો વાપર્યા હતા. ભાજપે કહ્યું કે આ કોંગ્રેસનો આદિવાસી વિરોધી ચહેરો દર્શાવે છે. ભાજપના પ્રવક્તા ગૌરવ ભાટિયાએ કહ્યું કે ‘તેમણે ભૂતપૂર્વ રાષ્ટ્રપતિ રામનાથ કોવિંદનું પણ અપમાન કર્યું હતું. દરેક વ્યક્તિ મલ્લિકાર્જુન ખડગે અને કોંગ્રેસ પાર્ટીની નિંદા કરી રહી છે. તમે રાષ્ટ્રપતિને કોઈ પણ આદર વિના ‘મુર્માજી’ કહીને સંબોધો છો અને પછી અંતે તેમને ભૂમિ માફિયા કહો છો. આખો દેશ જાણે છે કે જો દેશમાં કોઈ ભૂમિ માફિયા છે, તો તે નકલી ગાંધી પરિવાર છે.’ ગૌરવ ભાટિયાએ કહ્યું કે ‘મલ્લિકાર્જુન ખડગે રાષ્ટ્રપતિ દ્રૌપદી મુર્મુજી મુર્માજી અને ભૂતપૂર્વ રાષ્ટ્રપતિ રામનાથ કોવિંદજીને ‘કોવિદ’ કહે છે.

ખડગે રાષ્ટ્રપતિ દ્રૌપદી મુર્મુને ભૂમિ માફિયા કહે છે, કહે છે કે તે આપણી જમીન અને જંગલો છીનવી લેવા માટે રાષ્ટ્રપતિ બની છે. રાહુલ ગાંધીના ઇશારે, રિમોટ-કંટ્રોલ્ડ પ્રમુખ મલ્લિકાર્જુન ખડગે આદિવાસી વિરોધી, દલિત વિરોધી, મહિલા વિરોધી અને બંધારણ વિરોધી નિવેદનો આપી રહ્યા છે.

ખડગે પાસેથી માફીની માંગ

ભાજપ પ્રવક્તા ગૌરવ ભાટિયાએ કહ્યું કે ‘ઉદિત રાજ કહે છે કે કોઈ પણ દેશને દ્રૌપદી મુર્મુ જેવા રાષ્ટ્રપતિ ન મળવા જોઈએ. અધીર રંજન ચૌધરી રાષ્ટ્રપતિને રાષ્ટ્રપત્ની તરીકે સંબોધે છે. આ એક આદિવાસી મહિલા વિરુદ્ધ ખૂબ જ વાંધાજનક ટિપ્પણી છે. કોંગ્રેસના નેતાઓ માને છે કે દેશમાં ફક્ત નકલી ગાંધી પરિવારના સભ્યો જ બંધારણીય પદો પર બિરાજમાન થઈ શકે છે. અજય કુમાર કહે છે કે રાષ્ટ્રપતિ દ્રૌપદી મુર્મુ ખરાબ માનસિકતા દર્શાવે છે. મલ્લિકાર્જુન ખડગેનું આજનું વાંધાજનક નિવેદન એ વાતનો પુરાવો છે કે તેમણે પોતાની જીભ લપસી નથી. આ જાણી જોઈને કરવામાં આવ્યું હતું. અમે મલ્લિકાર્જુન ખડગે પાસેથી માંગ કરીએ છીએ કે તેઓ તેમના નિવેદન માટે માફી માંગે.’

‘મહિલા પેન્શન યોજના’માં રૂ. 200 કરોડના કૌભાંડનો AAP પર આરોપ

નવી દિલ્હી: દિલ્હીમાં સત્તામાં રહેલા ભાજપે કેજરીવાલની આમ આદમી પાર્ટી (AAP) પર ‘મહિલા પેન્શન યોજના’માં રૂ. 200 કરોડના કૌભાંડનો આરોપ લગાવ્યો છે. ભાજપે દાવો કર્યો છે કે લોકો ઈચ્છે છે કે CM રેખા ગુપ્તાની સરકાર દિલ્હીમાં અગાઉની કેજરીવાલ સરકારમાં થયેલા આ પેન્શન યોજના સાથે જોડાયેલા કથિત “કૌભાંડની” તપાસનો આદેશ આપે.

AAPએ આ આરોપનો જવાબ આપતાં દાવો કર્યો કે દિલ્હીમાં સત્તામાં આવેલો ભાજપ જનતા માટેની તમામ કલ્યાણકારી યોજનાઓ બંધ કરવા માગે છે. દિલ્હીના ભાજપ અધ્યક્ષ વીરેન્દ્ર સચદેવાએ દાવો કર્યો હતો કે હાલના નિષ્કર્ષ મુજબ પેન્શન યોજના હેઠળ નોંધાયેલા 83,000થી વધુ મહિલા લાભાર્થીઓ “બોગસ” અથવા “શંકાસ્પદ” છે અને આ કૌભાંડ દર વર્ષે રૂ. 200 કરોડનું છે.

સચદેવાને કહ્યું હતું કે દિલ્હીવાસીઓ હવે ઈચ્છે છે કે રેખા ગુપ્તાના નેતૃત્વમાં હાલની સરકાર આ મામલે ઉચ્ચ સ્તરીય તપાસ કરે. આ યોજના 18 વર્ષથી વધુ ઉંમરની એવી વિધવા, છૂટાછેડા લીધેલી, અલગ રહેતી, ત્યક્તા અથવા નિરાશ્રિત મહિલાઓ માટે છે જેમની પાસે જીવનનિર્વાહ માટે પૂરતાં સાધનો નથી અને જે ગરીબ અને નબળી વર્ગની ગણાય છે. આ યોજના અંતર્ગત આ મહિલાઓને સીધા તેમના ખાતામાં દર મહિને રૂ. 2500ની નાણાકીય સહાય આપવાની જોગવાઈ છે.

દિલ્હી ભાજપ દ્વારા જાહેર કરાયેલા નિવેદન મુજબ ગયા વર્ષે કેટલાક ભાજપ વિધાનસભ્યો અને મીડિયા પોર્ટલ્સે પેન્શનના વિતરણમાં અનિયમિતતાઓ અંગે ચિંતા વ્યક્ત કરી હતી અને તપાસની માગ કરી હતી. યોગ્ય મંજૂરી બાદ ઓક્ટોબર, 2024માં તપાસ શરૂ કરવામાં આવી હતી. જોકે તત્કાલીન સરકારે ફેબ્રુઆરી સુધી તપાસ પ્રગતિ રોકી દીધી હતી. ઉપલબ્ધ આંકડા મુજબ આ પેન્શન યોજના માટે કુલ 3,81,539 મહિલાઓની નોંધણી કરાઈ હતી.

આ નિવેદન મુજબ તપાસમાં 60,000થી વધુ બોગસ નોંધણી સંબંધિત અનિયમિતતાઓ માલૂમ પડી હતી. આ ઉપરાંત, 22,795 કેસોમાં અન્ય વિસંગતિઓ જોવા મળી હતી. 60,573 કેસોમાં તપાસકર્તાઓએ જણાયું હતું કે મહિલાઓ પોતાના નોંધાયેલા સરનામે મળી નહોતી કે પછી તેમની પાસે નિવાસનો કોઈ પુરાવો નહોતો. ઘણા કેસોમાં સરનામાં “બનાવટી” હતાં.

1...786787788...5,181Page 787 of 5,181