ફિલ્મ ‘1942: અ લવ સ્ટોરી’ (1994) ના ‘કુછ ના કહો’ ગીતનું સંગીત તૈયાર કરવા પાછળની અને એના રેકોર્ડિંગ 
અંગેની રસપ્રદ વાત નિર્દેશક વિધુ વિનોદ ચોપડાએ કહી હતી. વિધુએ સંગીતકાર આર. ડી. બર્મન ‘પંચમ દા’ પાસે અગાઉ ‘પરિન્દા’ (1989) નું સંગીત તૈયાર કરાવ્યું હતું. જ્યારે ‘1942: અ લવ સ્ટોરી’ માટે પણ એમને જ લેવાનું નક્કી કર્યું ત્યારે સંગીત કંપનીએ ના પાડી હતી અને કહ્યું હતું કે કોઈ નવા સંગીતકારને લેશો તો એના પૈસા ચૂકવશે. કેમકે એ સમય પર એમનું સંગીત કોઈ લેતું ન હતું. જ્યારે વિધુએ પંચમ દાને કહ્યું કે મારે આ ફિલ્મ માટે એસ. ડી. બર્મન જેવું સંગીત જોઈએ છે ત્યારે એમણે કહ્યું કે એ ચાલશે નહીં.
પંચમ દાએ સૌથી પહેલું ગીત ‘કુછ ના કહો’ તૈયાર કર્યું હતું. વિધુએ જ્યારે એની ધૂન સાંભળી ત્યારે એના શબ્દો બહુ ઝડપી હતા અને ડિસ્કો ગીત જેવું હતું. પંચમ દાએ પૂછ્યું કે કેવું લાગ્યું? ત્યારે વિધુએ કહ્યું કે વિચારીને જણાવું છું. એ એમને બકવાસ ગીત છે એમ કહી શકતા ન હતા. પંચમ દાએ એમને જે મનમાં હોય એ કહેવા કહ્યું. વિધુએ કહ્યું કે આ ધૂન બરાબર નથી. મારા મનમાં જે પ્રકારનું ગીત છે એવું આ નથી. એમણે કહ્યું કે તું સમજતો નથી. આજકાલ આવું જ ચાલે છે. વિધુએ કહ્યું કે હું નિર્માતા છું. મારે ચાલે કે ના ચાલે એવું નહીં મેં કલ્પના કરી છે એવું ગીત જોઈએ છે. પંચમ દાએ એક અઠવાડિયાનો સમય માંગ્યો. વિધુએ કહ્યું કે હું તમને એક વર્ષ આપીશ પણ મને જોઈએ છે એવું સંગીત આપો.
એક સપ્તાહ પછી એમણે વિધુને બોલાવ્યા અને ‘કુછ ના કહો’ ના લયમાં વાંસળીની ધૂનમાં બંગાળીમાં ‘રોન ગિલા રોન ગિલા રોન ગિલા રે’ ગાઈ સંભળાવ્યું ત્યારે વિધુએ સુંદર હોવાનો હાથથી ઈશારો કર્યો. પંચમ દાએ કહ્યું કે ગીત હજુ શરૂ થયું નથી. વિધુએ કહ્યું કે હજુ શરૂ થયું નથી તો પણ આટલું સારું છે તો તૈયાર થશે પછી કેટલું સરસ બનશે. ધૂન તૈયાર થયા પછી જ્યારે કુમાર સાનૂના સ્વરમાં રેકોર્ડ કરવામાં આવનાર હતું ત્યારે તે મોડા આવ્યા. સાનૂ ત્યારે જાણીતા અને બહુ વ્યસ્ત ગાયક હતા. ત્યારે સંગીત જીવંત રીતે આપવામાં આવતું હતું અને કામ કરતાં વાદકોની પાળી પૂરી થવામાં હતી. વળી સાનૂએ આવીને કહ્યું કે તેણે બીજે રેકોર્ડિંગમાં જવાનું હોવાથી અડધો કલાક જ છે. તેથી વિધુ ગુસ્સે થઈ ગયા અને સાનૂ એ દિવસે વધેલી દાઢી સાથે હતા. વિધુએ કહ્યું કે તું સારો દેખાતો નથી અને થાકેલો છે. તારી પાસે આખો દિવસ હશે ત્યારે રેકોર્ડિંગ કરીશું અને જો તને સમય નહીં હોય તો બીજા ગાયકને શોધી લઇશ.
પંચમ દાએ વિધુને સમજાવ્યા કે જો રેકોર્ડિંગ નહીં થાય તો પણ વાદ્ય કલાકારોને પૈસા ચૂકવવા પડશે. વિધુએ કહ્યું કે એનો વાંધો નથી. સાનૂના થાકેલા અવાજમાં અને આવા ગંદા દેખાવ સાથે રેકોર્ડિંગ કરશે નહીં. સાનૂએ વિધુની વાતનું ખોટું લગાડ્યું નહીં અને ત્રણ દિવસ પછી દાઢી કરીને રેકોર્ડિંગ માટે આવ્યા અને વિધુને એક ફાઉન્ટેન પેન ભેટમાં આપી ગાવાનું શરૂ કર્યું. કુમાર સાનૂએ દિલથી ગીત એવું ગાયું કે બહુ લોકપ્રિય રહ્યું હતું. ‘કુછ ના કહો’ ગીત લતા મંગેશકરના અવાજમાં પણ રેકોર્ડ થયું હતું. એ ગીતના રેકોર્ડિંગ પહેલાં જ પંચમ દા મૃત્યુ પામ્યા હતા. એમના વગર જ લતાજી સાથે ગીતનું રેકોર્ડિંગ કરવામાં આવ્યું હતું.
