અમેરિકા: દેશના ઉપપ્રમુખ જેડી વેન્સના ભારતીય મૂળના પત્ની ઉષા વેન્સે ભારત-અમેરિકા સંબંધોને તેમના માટે ખૂબ જ અંગત ગણાવ્યા. વોશિંગ્ટનમાં અમેરિકા-ઈન્ડિયા સ્ટ્રેટેજિક પાર્ટનરશિપ ફોરમ (USISPF) લીડરશીપ સમિટના આઠમા સંસ્કરણમાં વાતચીત દરમિયાન ઉષા વેન્સે કહ્યું, ‘બંને દેશો વચ્ચે ખૂબ જ અંગત સંબંધ છે, કારણ કે મારા પરિવારના સભ્યો ભારતમાં રહે છે અને મારા પરિવારના ઘણાં સભ્યો અમેરિકામાં પણ રહે છે. હું ભારતની મુલાકાત લઈને અને મારા પરિવારના સભ્યોને મળીને મોટી થઈ છું.’

ઉષા વેન્સ PM મોદી વિશે શું કહ્યું?

ભારતની મુલાકાત દરમિયાન વડાપ્રધાન નરેન્દ્ર મોદીએ જેડી વેન્સ અને પરિવારને તેમના નિવાસસ્થાન 7 લોક કલ્યાણ માર્ગ પર આમંત્રણ આપ્યું હતું. મુલાકાત અંગે ઉષા વેન્સે કહ્યું, “વડાપ્રધાન નરેન્દ્ર મોદીને મળવું ખરેખર ખૂબ જ ખાસ હતું. મારા બાળકોએ તેમને જોયા, તેમણે દાઢી અને સફેદ વાળવાળા એક ભારતીય વ્યક્તિને જોયો અને તરત જ PM મોદીને દાદા માની લીધા હતા. મારા બાળકો તેમનાથી ખૂબ પ્રભાવિત થયા છે; તેઓ તેમને ખૂબ પ્રેમ કરે છે અને તેમણે ખરેખર અમારા 5 વર્ષના બાળક સાથેની મિત્રતાને તે દિવસે જન્મદિવસની ભેટ આપીને મજબૂત બનાવી. જ્યારે અમે તેમના ઘરે ગયા, ત્યારે મારા બાળકો ફક્ત દોડતા રહ્યા, તેઓ PMને ગળે લગાવી રહ્યા હતા. વડાપ્રધાન બાળકો પ્રત્યે અતિ દયાળુ અને ઉદાર હતા.”

અમારા બાળકો હંમેશા ભારત વિશે વાત કરે છે

ઉષાએ આગળ કહ્યું, ‘જ્યારે અમે વડાપ્રધાનના નિવાસસ્થાને હતા, ત્યારે અમારો પુત્ર દરેક વસ્તુથી એટલો પ્રભાવિત થયો હતો અને પછી તેને કેરીની આખી ટોપલી ખાવાનું એટલું ગમ્યું કે તેણે વડાપ્રધાનને કહ્યું કે તે કદાચ અહીં રહી શકે છે. અમારા બાળકો હંમેશા તેના વિશે વાત કરે છે. તેઓ દરેક જગ્યાએ રહ્યા છે અને તેમને દુનિયા જોવાની અદ્ભુત તકો મળી છે, પરંતુ ભારત ખરેખર તેમના માટે ખાસ હતું. અમે જયપુરમાં પપેટ શો જોયો. દેશભરના કલાકારો કઠપૂતળી પ્રદર્શન કરવા આવ્યા હતા, જેમાં કેટલાક આંધ્ર પ્રદેશના કલાકારો પણ સામેલ હતા, જ્યાં મારો પરિવાર રહે છે. તે એક ખાસ હાઇલાઇટ હતું. અમે પપેટ શો દરમિયાન રામાયણના કેટલાક ભાગો જોયા, પ્રાણીઓ સાથેના કેટલાક રમૂજી ભાગો હતા, અને તે ખૂબ જ સફળ રહ્યો. મારા બાળકો કાગળમાંથી ઘરો બનાવવાનો પ્રયાસ કરી રહ્યા છે, જે તેમણે ભારત પ્રવાસ દરમિયાન જોયું અને શીખ્યા.’

ઉષા વેન્સે કહ્યું કે, “સ્વાભાવિક રીતે અમેરિકા અને ભારત વચ્ચેના સંબંધોમાં ક્યારેક ઉતાર-ચઢાવ આવતા રહ્યા છે. પરંતુ હાલમાં, મને લાગે છે કે, આગામી ચાર વર્ષોમાં અને ભવિષ્યમાં, અહીં ભારતીય-અમેરિકન વસ્તી સ્થાપિત થઈ ગઈ છે અને ભારતમાં ઘણાં લોકો છે જે યુ.એસ.ને જાણે છે અને અહીંના લોકોને જાણે છે, જેઓ મહાન કાર્ય કરી રહ્યા છે, જેમની પાસે મહાન તકો છે.